Energy Storage

Mugikortasun-eredu berriak Gipuzkoako industriari eta gizarteari dakarzkien aukeren ikuspegi oso bat aurkeztu zuen STARTNOWek. Miramongo Teknologia Parkean egin zen biltzarrra, CIDETECek eta Gipuzkoako Foru Aldundiak antolatua.

Teknologia adimentsuagoa, etorkizun garbiagoa eta gizarte jasangarriagoa:horra biltzarraren hiru promesak. uztailaren 4an eta 5ean egin zen topaketa, Etorkizuna Eraikiz programaren barruan.”Mugikortasun jasangarrirako trantsizioan murgildurik dabiltza mundua, Euskadi eta, noski, Gipuzkoa.Etorkizuneko erronka hori orainean ere nabari da jada, gure enpresa, erakunde eta kaleetan”, adierazi zuen Gipuzkoako Foru Aldundiko Ekonomia Sustapena, Landa Ingurunea eta Lurralde Orekako foru-diputatu Ainhoa Aizpuruk.”Gure herrialdearen etorkizuneko eginkizunak orainaldira ekartzeko ahaleginean dabil Gipuzkoako Foru Aldundia, bi helburu hauek ardatz dituela:gure ekonomiaren egitura sendotzea, eta gizartearen ongizatea areagotzea.Bi helburu horiek jasotzen ditu elektromugikortasunaren aldeko gure ekimenak,zeinak aukera ematen baitigu industria berri bat bultzatzeko eta mugikortasun jasangarria sustatzen jarraitzeko”.CIDETEC Energy Storageren zuzendari den Óscar Miguelek, berriz, beste hau adierazi zuen: “Kontua ez da, soilik, elektromugikortasunak erabiltzaileoi dakarzkigun abantaila ugariez baliatzea, baizik eta aprobetxatzea teknologia berri horien ezarpenak eta kudeaketak gure ekoizpen-egiturari ekonomiaren aldetik eskaintzen dizkion aukerak”.”Gipuzkoako zenbait enpresa aitzindari dira jada ibilgailu elektrikoa eta energiaren biltegiratze adimentsua oinarri dituen ekonomiaren berehalako hedapenean”, esan zuen Óscar Miguel doktoreak.”Hori dela eta, posizio ezin hobean dago Gipuzkoa, eta aprobetxatu egin behar dugu abantaila hori”, gaineratu zuen.

Biltzarraren lehenbiziko egunean, industriaren zenbait alorretako enpresa ezagunetako ordezkariak mintzatu ziren.Nissan, Leclanchè, Acciona Energía, Atotech eta Vicomtecheko ordezkariek beren esperientziak eta proposamenak azaldu zituzten, ikuspegi oso desberdinetatik azaldu ere. Ikuspuntu orokorrago batetik mintzatu ziren Shmuel de Leon —energiaren biltegiratzearen alorreko aditua, mundu osoan ezaguna— eta Michael Krausa, Alemaniako KLIB bateria aurreratuen plataformakoa.

Hilaren 5ean, berriz, eredu teknologiko berriak mugikortasunaren alorrean izango duen gizarte-eragina aztertu zuen biltzarrak, non ugariagoak izan ziren erakunde publikoetako ordezkariak (Foru Aldundia, CDTI, IBIL…) eta eredu berri hori ezartzeko zerbitzuak eta produktuak egiten dituzten enpresetakoak (Irizar, IBM…). Amaitzeko, mahai-inguru bat egin zuten hezkuntzako, ikerketako eta administrazio publikoko zenbait kidek, datozen aldaketek herritarrongan zer eragin izango duten mintzagai zutela. Julio Díaz de Alda kazetaria aritu zen moderatzaile.

Bestalde, ibilgailu elektrikoen erakusketa bat egin zen hilaren 5ean, auditorioaren kanpoko aldean. Renault eta Nissan marketako furgonetak eta turismo-autoak, Irizarren ieTram autobus berria (Donostiako Dbus-ena) eta Tesla eta BMW marketako goi-mailako autoak jarri zituzten ikusgai erakusketan.Ibilgailuak miresteko ez ezik, haietan ibiltzeko aukera ere izan zuten biltzarrera inguratu zirenek, eta auto isil, garbi eta eraginkorretan mugitzearen abantailez gozatu zuten.

%MCEPASTEBIN%

STARTNOW biltzarra egingo da uztailaren 4an eta 5ean Donostiako Teknologia Parkean, Gipuzkoako Foru Aldundiak eta CIDETEC EnergyStoragek antolatuta.

Elektromugikortasunarekin eta energia-metaketarekin erlazionatutako teknologien azken aurrerapenak azalduko dira biltzarrean, eta arreta berezia jarriko zaie haien balio-kate osoko zailtasun eta aukerei, baita haiek gizartean izango duten inpaktuari ere. Enpresei, teknologoei, ikertzaileei eta administrazioari zuzendua dago ekitaldia, baita han landuko diren gaiei buruzko interesa duen orori ere.

Biltzarra doakoa da, eta izena eman behar da aldez aurretik, http://www.startnow.eus/asistencia/ webgunean. Gehienez ere 200 lagunentzako tokia dago.

Lehen egunean, uztailaren 4an, punta-puntako bi adituk azalduko dute gaur egun zer egoeratan dagoen teknologia hori nazioartean: Shmuel de Leon aditua, mundu osoan ezaguna, eta MichaelKrausa, KLIB baterien plataformakoa (Alemania), Alemaniako adibidearen berri emango duena. Punta-puntako zenbait enpresatako ordezkariak ere izango dira jardunaldian, eta elektromugikortasunaren inguruko hainbat jakintza-alorri buruz duten ikuspegia azalduko dute. Besteak beste, enpresa hauek hartuko dute parte: Leclanché, Nissan, Acciona, Atotech eta IBM.

Ekainaren 5ean, paradigma teknologiko berri horren inpaktu soziala aztertuko da, eta garraio publikoa kudeatzen duten zenbait erakundek eta enpresak hartuko dute parte saioan. (Ikusi programa osoa: http://www.startnow.eus/programa/)

Bestalde, ibilgailu elektriko batzuk erakutsiko eta probatuko dira egun horretan, hala nola BMW, Tesla, Renault eta Nissan etxeen modelo gailenak eta iTram autobus elektrikoa, Irizarrena, Donostiako Dbus konpainiak erabiltzen duena.

Webgune honetan dago biltzarrari buruzko informazio guztia: http://www.startnow.eus/.

Hurrengo apirilaren 16an eta 17an, TRA 2018 batzar ezaguna egingo da Vienan, Europar Batasunaren eta sektoreko Europako plataforma teknologiko nagusien (ERTRAC, adibidez) laguntzarekin.TRA foroa bi urtez behin egiten da, eta industria, ikerketa eta garraioaren arloan aktibo dauden agintari publikoak elkartzen dira.Arlo horretan indarrean dauden erronka nagusiekin bat etorriz, edizio honetako gai nagusiak hauek izango dira: digitalizazioa, karbonogabetzea eta mugikortasun-eredu berriak.

CIDETEC Energy Storage-ek lehenengo aldiz hartuko du parte ekitaldi horretan, eta, gainera, bere parte-hartzea handia izango da:titular edo egilekide gisa jardungo du osoko hiru aurkezpenetan, bost posterretan eta hiru standetan.Bestalde, baterien teknologiei buruzko lantegi paralelo bat egingo da, arlo horretako Europako hiru proiektuk elkarlanean antolatuta: Five VB, Spicy eta eCaiman. Cidetecek partaidetza du azken bietan.

Erakusketari dagokionez, nabarmentzekoa da Cidetecek Europako Batzordearen standari egingo dion ekarpena, zeina proiektuen emaitzen berri emateko foro gisa sortu baita. Spicy eta eCaiman proiektuen esparruan —non Cidetecek parte hartzen duen— garatutako bateria-moduluen piezen, elektrodoen eta zelulen laginak erakutsiko dira.Bestalde, EGVIAren (European Green Vehicles Initiative Association) standean, berriki martxan jarri den IModBatt proiektuari buruzko informazioa banatuko da. Automobilgintzarako bateria-paketeen teknologia aurreratuei buruzko proiektua da, eta CIDETEC Energy Storage izan du koordinatzaile.

Argonne National Laboratory (EEUU) eta Mercedes Benz R&D North America erakundeekin elkarlanean, CIDETEC Energy Storageko ikertzaileek frogatu dute gehigarri bati esker litio ioizko bateriek nabarmen hobeto jasaten dutela gainkarga.

Gehigarri hori (di-tert-butil bis-metoxi-etoxi bentzenoa edo DBBB) Zhang doktoreak (Argonne National Lab) garatu eta patentatu du. Dagoeneko probatu zuten beste formatu zurrun batzuetan, hala nola zilindrikoan, baina orain arte ez zen probatu pouch cell motako formatua, zeina oso arina eta konpaktua baita eta horregatik ikusmin handia pizten ari baita automobilgintzan, besteak beste.

DBBB gehigarria, zehazki, CIDETEC Energy Storagek fabrikatu eta probatu dituen eta grafito/LFP (litio eta burdin fosfatoa) kimika duten litio ioizko zeluletan probatu da.

LFPzko bateriak bereziki seguruak direlako nabarmentzen dira, eta gehiegikeria mekanikoak eta elektrikoak jasaten dituzte sutu gabe, beste nahaste kimiko batzuek ez bezala. Hala eta guztiz ere, bateriak gainkarga jasaten duenean, elektrolitoak xurgatzen du gehiegizko korrontea, eta deskonposatu egiten da, gasak askatuz. Ondorioz, bateriak kalte itzulezinak jasaten ditu. Gaur egun, baterien kontrol-sistema elektronikoei esker (BMs edo battery management system), oso gutxitan gertatzen dira halakoak, baina kostua nabarmen handituta lortzen da hori.

Ikerketa hau oraintsu argitaratu da ACS Applied Materials & Interfaces aldizkari ospetsuan. Ikerketan, % 200eko gainkarga-prozesu bat jasanarazi zaie bateriei —hau da, zeluletan haien ahalmen nominala halako bi sartu da—. DBBB gehigarria duten zelulek 700 ziklo baino gehiago egin dituzte beren ahalmena halako biko gainkargarekin, kalte fisikorik eta elektrokimikorik hautematen ez zitzaiela. Zelula horiekin paraleloan zeuden eta gehigarririk ez zuten zelulek, aldiz, ezin izan zuten jasan ziklo oso bat bera ere baldintza horietan, elektrolitoa deskonponsatu egiten baitzen, eta, ondorioz, gasa askatu, bateria puztu eta hura guztiz hondatu.

Emaitza horiek baterien segurtasuna areagotzeko aukera asko dakartzate, bai ibilgailu elektrikoetarako eta bai beste aplikazio batzuetarako, eta, aldi berean, kostuak txikiagotzen dituzte, kontrol-sistema elektronikoan sinplifika baitaitezke.

CIDETEC Energy Storagek parte-hartze nabarmena izan du urtarrilean Bruselan bateriei buruz Europako Batzordeak antolatutako bi ekitaldi estrategikotan.

Energiaren eta garraioaren sektoreek zeregin erabakigarria dute eurozonaren ekonomian. Bestalde, berek sortzen dituzte berotegi-efektuko gas-emisioen ia hiru laurdenak. Horregatik, funtsezkoa da neurriak hartzea emisio apaleko garraio-sistema jasangarri eta aberastasun-sortzaile baterantz joateko trantsizioa azkartzeko. Testuinguru horretan, bateriek zeregin nabarmena izango dute garraioa elektrifikatzeko eta energia-kudeaketa eraginkorragoa lortzeko.

Europako Batzordeak “Battery Alliance” ekimena plazaratu du Europako baterien sektorearen lehia-ekosistema baten garapena sustatzeko eta Europan fabrikatzeko ahalmenak ezartzea errazteko. Ekimen horrek aukera eman behar du beste zona batzuekiko mendekotasun teknologikoa gutxitzeko eta, hala, ezagutza, lana eta aberastasuna sortzeko maila lokalean.

Ikerketak eta garapenak zeregin funtsezkoa izango dute estrategia horretan. Ahaleginak zer lehentasun teknologikotan ezarri behar diren eztabaidatzea sustatzeko, Europako Batzordeak, bere Ikerketa eta Berrikuntzako Zuzendaritza Nagusiaren bidez, “European Battery Cell R&I Workshop” ekitaldia antolatu zuen 2018ko urtarrilaren 11n eta 12an. Ekitaldian, eragile teknologiko eta industrial nagusiek eta Europako Batzordearen mailako eragile politiko nagusiek hartu zuten parte: guztira, 250 parte-hartzailetik gora izan ziren.

CIDETEC Energy Storage gonbidatua izan zen workshop horretan modu aktiboan parte hartzeko, haren ibilbidea eta gaitasunak kontuan harturik, eta presentzia nabarmena izan zuen. Lehen jardunaldian, ikerketa eta garapeneko hiru europar erakunde hautatu ziren eztabaida teknikoaren oinarriak ezartzeko osoko bilkurarako txosten baten bidez, eta CIDETEC izan zen hiru horietako bat.

Oscar Miguel Crespo doktore eta CIDETEC Energy Storageko zuzendariari esleitutako eginkizuna izan zen aurkeztea eta erreibindikatzea zer garrantzi duten instalazio pilotuek bateria-teknologia berrietako ikerketa-prozesuaren balio-katean, bai eta ekimen bat plazaratzea ere europar sare bat ezartzeko esparru horretan egiten ari diren ekimenak koordinatzeko.

Bigarren jardunaldia eztabaida-saio paraleloen formatuan antolatu zen, eta Oscar Miguel doktorearen ardura izan zen gai berari buruzko saioa moderatzea. Saio horretan parte hartu zuen Idoia Urdampilletak ere, CIDETEC Energy Storageren Energiarako Materialaren Unitatearen arduradun eta  bateria-instalazio pilotuaren arduradun teknikoak.

Ekitaldi hori baino lehen, aurretiko workshop tekniko bat izan zen, Europako Batzordeak antolatua hori ere, DG Connect-en bidez kasu honetan, epe luzeagoko helburu batekin: “Flagship” motako ekimen bat plazaratzea egungo bateria-teknologien lekukoa hartu behar duten teknologia berrietan ikertzeko. Ekitaldi hori selektiboagoa izan zen, zuzeneko gonbidapena behar zen, eta hartan ere parte hartu zuen CIDETEC Energy Storagek Miguel doktorearen bidez.