Korporatiboa

Instalazio berri horiek martxan jarrita, indartu egin du CIDETECek gainazalen ingeniaritzaren berrikuntzan eta garapenean duen aitzindari-posizioa.

Uztailaren 19an inauguratu ziren ofizialki CIDETEC Surface Engineeringen instalazio berriak, Miramoneko Zientzia eta Teknologia Parkean. Eusko Jaurlaritzaren lehendakaria, Iñigo Urkullu, izan zuen buru ekitaldiak, non beste zenbait agintari eta enpresari ere izan baitziren: Arantxa Tapia, Eusko Jaurlaritzako Ekonomiaren Garapeneko eta Azpiegituretako sailburua; Markel Olano Arrese, Gipuzkoako diputatu nagusia; Ainhoa Aizpuru, Gipuzkoako Foru Aldundiko Ekonomia Sustapena, Landa Ingurunea eta Lurralde Orekako foru-diputatua, eta Eduardo Junkera eta Javier Rodríguez, CIDETECeko presidentea eta zuzendari nagusia, hurrenez hurren.

Instalazioak bertatik bertara ikusi zituzten agintariek inaugurazio-egunean. Goi-mailako tresneriaz hornitua dago lantegi berria; polimero eta konposite aurreratuak sintetizatu, karakterizatu eta prozesatzeko ekipamendua du, eta gainazalak aztertu, karakterizatu eta tratatzeko erabat ekipatutako laborategiak.

“2015aren amaiera aldera erabaki genuen gure esfortzuak batu behar genituela etorkizunerako; gehiago espezializatu, arriskatu, lehiatu behar genuela, hartara gure ekarpena ere handiagoa izan dadin”, esan zuen CIDETECeko zuzendari nagusiak. “Bilakaera-prozesu horretan, gidari izan ditugu Eusko Jaurlaritzaren berrikuntza- eta teknologia-politikak eta, aukera honetaz baliatuz, haiekin guztiz bat gatozela adierazten dut”.

Ekitaldiaren oroigarri, plaka bat erakutsi zen saioaren amaieran. Han ziren CIDETECeko patronatuko erakundeetako kideak, euskal enpresari-elkarte eta -erakundeetakoak, eta CIDETCek lan egiten duen sektore industrialetako enpresa nagusietakoak.

Eduardo Junkera, CIDETECeko lehendakaria, eta Javier Rodríguez, CIDETECeko zuzendaria, Repsoleko lehendakari Antonio Brufaurekin eta Petronorreko lehendakari Emiliano López Atxurrarekin bildu ziren, ekainaren 14an, segimendua egiteko mugikortasun elektrikoak gaur egun dituen mugak minimizatzeko edo ezabatzeko teknologiak garatzeko erakunde horiek duten lankidetza-hitzarmenari.Lan horren ardatz nagusia hau da: antzeko pisua eta neurria duen bateria batekin autonomia areagotzeko energia espezifikoa eta dentsitate egokia lortzea.

Mugikortasun elektrikoa garatzen eta hura hobeto zabaltzen laguntzeko teknologiak sustatzea eta garatzea da lankidetzaren helburu nagusia.Horretarako, nabarmen hobetu nahi dira gaur egungo bateriak, baita harago jo ere eta, adibidez, biltegiratze-teknologia iraultzaileak garatu.

Petronor instalazioetan egin zen bilera. Erakunde hori CIDETECen patronatuko kidea da ekainaren 1etik.

CIDETEC Fundazioaren gobernu-organo nagusia sendotu egin da, orain arte zituen zortzi patronoez gainera (Irizar, Egile, Iberdrola, Maier, Mugape, Euskal Herriko Unibertsitatea, BIC Gipuzkoa eta Gipuzkoako Foru Aldundia) beste bi patrono sartuta.

Patrono berrien izaerak sendotu egiten du patronatuaren ahalmena. Hala, osatu egiten da instituzioen presentzia eta eragile industrial handiek CIDETECen proiektu korporatiboarekin duten konpromisoa. Alde horretatik, nabarmentzekoa da patronatuan dauden entitateak goren mailakoak direla energiaren sorkuntzan eta banaketaren arloan, automobilgintzako osagaien fabrikazioan eta aeroespazioko industrian.

Europako Parlamentuko ordezkaritza batek, tartean zirela diputatuak, haien laguntzaileak eta ALDE taldeko staffeko kideak, CIDETEC bisitatu zuten maiatzaren 22an.

Iosu Madariagak, Eusko Jaurlaritzako Teknologia eta Estrategiako zuzendariak, parte hartu zuen topaketan, eta Eusko Jaurlaritzaren berrikuntza-kontuetako estrategiari buruzko azalpena eman zuen.Cidetec-eko zuzendariak, Javier Rodriguezek, azalpen txiki bat eman zuen erakundearen egungo errealitateari buruz, eta jarduera zein esparrutan garatzen duen azaldu zuen.

Ekitaldiaren atal nagusia CIDETECeko instalazioak bisitatzea izan zen. Hiru zentroetako zuzendariek (Nanomedicine, Surface Engineering eta Energy Storage) gidari-lanak egin zituzten, eta ekipamenduak, gaitasunak eta jarduera garrantzitsuenak erakutsi zizkieten.

Bisitaren ingurumaria Europarako Liberalen eta Demokraten Aliantza taldeak (ALDE) egindako urteko bilera izan zen, aurten EAJk gonbidaturik Donostian egina, eta haren barruan garatutako jarduera-programa.200 pertsona inguruk, Guy Verhofstadt Belgikako lehen ministro ohia buru zutela —taldeko lehendakaria eta Brexitaren negoziatzaile nagusia Europako Parlamentuaren izenean—, koordinazio-bilera hori baliatu zuten harreman instituzionalak izateko; horien artean, Urkullu lehendakariarekin egindako topaketa.