OPINCHARGE

In operando analisiak egitea eta interfaze-dinamika eta karga-garraioa modelizatzea litio-ioizko baterietan – OPINCHARGE proiektua ikerketa-ekimen anbiziotsu bat da, eta helburu argia du: aurrera egitea litio-ioizko bateriak ulertzeko eta optimizatzeko bidean. Bateria horiek aplikazio askotan erabiltzen dira, hala nola ibilgailu elektrikoetan eta elektronika eramangarrian. Proiektuak partzuergo bat elkartu du, ikerketa-erakunde nabarmenez eta bateria-teknologiaren arloko adituz osatua.

OPINCHARGE egitasmoaren helburu nagusia da litio-ioizko baterien interfazeetan gertatzen diren funtsezko prozesuak eta degradazio-mekanismoak ikertzea. Interfaze horietan material aktiboak, elektrolitoak eta beste osagai batzuk elkartzen dira, eta guztiek ere eginkizun erabakigarria dute baterion errendimenduan eta bizitza erabilgarrian. Proiektuak fenomeno interfazialen gaineko ezagutzan sakontzen du, eta, haren bidez, litio-ioizko baterien diseinua eta funtzionaltasuna hobetu nahi ditu. Hala, bateria-sistema seguruagoak, efizienteagoak eta iraunkorragoak sortuko dira.

Ikerketa-ahalegin horiek konbinatuz, OPINCHARGE proiektuak litio-ioizko baterien interfazeen ulermen holistikoa eskuratu nahi du, hasi nanoeskalako interakzio atomikoetatik eta mesoeskalako garraio-fenomenoetaraino. Ikerketa honetatik lortzen diren ezagutzei esker, bateria-diseinu eta -material berritzaileak garatu ahal izango dira, eta, hala, litio-ioizko bateria seguruago eta jasangarriagoak lortuko dira, errendimendu handiagokoak eta aplikazio-sorta zabalerako.

Azken buruan, OPINCHARGE proiektuaren helburua da baterien teknologiari aurrera egiten laguntzea, eta, horrenbestez, etorkizun ekologikoki eta energetikoki efizienteago baterako trantsizioa bultzatzea.

CIDETEC Energy Storage proiektu honetako kide da. Bi lan-proiektutan hartzen du parte nagusiki, eta haietako bat berak gidatzen du. Alde batetik, tarteko faseen modelizazioa aztertuko du mesoeskalan, karakterizazio-tekniketan oinarrituta, eta elektrodoen diseinuan, gelaxken integrazioan eta elektrodoen monitorizazio jarraituan egingo du lan. Eta, bestetik, Datuak Kudeatzeko Planarekin, irizpideen FAIR datu-basearekin eta Battery 2030+ eta haren inguruko proiektuekin lotutako jarduerak gidatuko ditu.