Hidrogenoa funtsezko zutabe modura kokatu da jasangarritasunaren etorkizunerako, gakoak diren sektoreak (besteak beste, mugikortasuna, garraioa, industria eta energiaren sorrera) errotik eralda ditzakeen itxaropen handiko energia-irtenbidea eskainiz. H2-a energia-iturri gisa erabiltzeak gas kutsatzaileen emisioak nabarmen murrizteko ahalmena du. Horrela, klima-aldaketaren aurkako borrokari eta populazio handiko hiri-eremuetan airearen kalitatea hobetzeari begira aurrerapausoak emanez. Haatik, H2-ak etorkizuneko ekonomia jasangarrian duen ahalmen osoa desblokeatzeko, ezinbestekoa da zenbait erronka tekniko eta ekonomiko gainditzea. Horrek berekin dakar H2-a ekoizteko, biltegiratzeko eta erabiltzeko teknologia seguru eta efizienteak garatzea, eta hornidura-azpiegitura irisgarri eta ekonomikoki bideragarriak sortzea.
Testuinguru horretan, erronka horiei osotasunean heltzeko industria-ikerketako ekimen modura azaleratzen da HiMugi proiektua. Mugikortasunerako eta garraiorako H2 sistema efizienteago, seguruago eta jasangarriagoak garatuz, hauxe da HiMugiren helburua: H2-arekin zerikusia duten ikerketan eta teknologian aurrerapausoak emateaz gain, haren erabileraren bideragarritasuna erakustea, etorkizun jasangarriago bateranzko bidean mugarri garrantzitsua baita.
HiMugi proiektuaren ikuspegia hirukoitza da. Lehenik eta behin, H2-ko gordailu zilindriko metatuen (edo tutu-formakoen) diseinu/fabrikazioan jasangarritasuna areagotzea, errendimendua arriskuan jarri gabe ingurumen-aztarna murriztu dezaketen oinarri biologikoko material berriak arakatuz, eta alferrikako galera gutxitu eta energia-efizientzia areagotuko duten fabrikazio-prozesu berriak garatzea. Bigarrenik, metalezko osagai kritikoen ikerketan aurrera egitea, hainbat erronka gaindituz; adibidez, H2 bidezko ahultzea eta fabrikazio gehigarriko teknikak optimizatzea, geometria konplexuko osagaiak (kontrol termikoa eta ihesak barne hartuta) ekoizteko. Azkenik, HiMugi proiektuak osoko segurtasunari erreparatzen dio, erabilera-aukera ezberdinak simulatzeko eta balizko arriskuei aurrea hartzeko metodologia aurreratuak eta tresna digitalak txertatuz, jardunbide seguruago eta fidagarriagoa bermatzeko.
CIDETEC-en ekarpena:
CIDETEC erakundeak funtsezko zeregina betetzen du, epoxi 3R erretxin birziklagarri, konpongarri eta birprozesagarrian oinarritutako material termoplastiko eta konpositeak ikertzen eta garatzen, guztiak hidrogenoa biltegiratzeko tangetarako iturri berriztagarrietatik eratorriak (oinarri biologikodunak). Halaber, zeregin funtsezkoa betetzen du horien fabrikazio-prozesuetan (filament winding eta ATL).
Gainera, CIDETEC erakundeak proiektuan nahasitako enpresekin kolaboratzen du, metalezko osagaien egiturazko propietateetan hidrogenoak duen eragina garatzen, probatzen eta aztertzen. Orobat, estalketa elektrolitikoarekin zerikusia duten jarduerak zuzentzen ditu, hidrogeno bidezko ahultzearen aurreko erresistentzia hobetzeko eta hidrogenoa biltegiratu eta garraiatzean erabilitako metalezko materialen errendimendua optimizatzeko.