MAIERek eta CIDETECek I+G+b arloko aliantza estrategikoa indartu dute akordio berri batekin

• Zentro teknologikoak automobilgintzaren sektorerako produktu plastiko estetiko eta funtzionalen garatzaile eta fabrikatzailearen bazkide estrategikoa izaten jarraituko du, eraldaketa teknologiko sakon batean murgilduta.
• Bi erakundeek, gainera, ideia eta negozio-proposamen berriak sortzea bilatuko dute.

MAIER, automobilgintzarako osagai estetiko eta funtzionalen fabrikazioan liderra den multinazionala, eta CIDETEC, gainazalen ingeniaritzan espezializatutako ikerketa aplikatuko erakundea, aliantza estrategikoa berritu dute, I+G+B arloan eta negozio eredu berrien esplorazioan lankidetza estuan jarraitzeko. Akordio berriak bi urteko indarraldia du, eta CIDETEC funtsezko eta ezinbesteko bazkide teknologiko gisa sendotzen du MAIERentzat.

MAIER 2003an CIDETECen patronatuan sartu eta 2005ean lehen lankidetza-hitzarmena sinatu zuenetik, bi erakundeek harreman estrategiko iraunkorra eraiki dute abangoardiako teknologien baterako garapenean. Esparru Akordio honek ibilbide hori amaitu eta proiektatu nahi du, CIDETEC ikerketan punta-puntan kokatuz, teknologiak erakartzeko eta ideia berriak sortzeko polo gisa, MAIER automobilgintzarako multzo estetiko eta funtzionalen sektorean erreferentziazko enpresa berritzaile gisa kokatzen jarraitzeko.

Lankidetza ez da soilik automobilgintzaren sektoreko berrikuntza teknologikoan zentratzen, merkatu berrietara dibertsifikatzeko atea ere irekitzen du, CIDETECen esperientzia eta MAIERen gaitasun industriala aprobetxatuz. Sektoreko muga tradizionaletatik haratago, negozio potentzial berriak esploratzeko lankidetza espazio espezifikoak gaitzea aurreikusten da. Horren adibide da duela urtebete OBS sortu izana, mugikortasunaren sektorea elektrifikatzera eta energia berriztagarrietan elektrizitatea biltegiratzera bideratutako bateria osagaiak diseinatzeko eta fabrikatzeko. MAIERek sortu zuen, eta CIDETECen parte hartzea du.

Era berean, akordioak ezartzen du bi erakundeek urtero ebaluatuko dituztela CIDETECen gaitasun teknologikoetatik sortutako enpresa ekimen berriak, MAIERentzat aukera estrategiko berri bihur daitezkeenak.

Akordio hau beste urrats bat da epe luzerako lankidetza eredu bat sendotzeko, berrikuntzan, ezagutzaren transferentzian eta etorkizuneko ikuspegi partekatuan oinarrituta.