Surface Engineering

CATEC zentroan urriaren 29an eginiko jardunaldian burutu zen INLIGHT proiektuaren itxiera teknikoaren bilera

Etorkizuneko hegazkinetarako leiho adimendunen belaunaldi berria garatzeko helburuarekin, CIDETECek INLIGHT proiektu europarra koordinatu du 2012az geroztik, EBko VII. Esparru Programak finantzatuta, guztira 4 milioi €-ko aurrekontuarekin.

 

Proiektuan, enpresa aeronautiko garrantzitsuek hartu dute parte, besteak beste,  AIRBUS Groupek eta GKN Aerospacek, eta beste zentro teknologiko batzuk ere aritu dira, hala nola, IK4-TEKNIKER, Fraunhofer ISC eta VTT.

 

Proiektua garatzen emandako 3 urteetan bete egin dira hasieran planteatutako helburuak, hau da, bidaiariaren nahierara iluntzeko edo argitzeko leiho adimendunak garatu dira, gehiegizko argitasun edo itsutasun-egoerak galarazteko; hala, erantzuna eman zaio bidaiarien erosotasuna hobetuko duten sistemen eskaera gero eta handiagoari.

 

Proiektuan erabilitako teknologia material elektrokromikoetan oinarritu da; materialok kolorez aldatzen dira eremu elektriko txiki baten mende jartzen direnean. Halaber, leihoen azaleran OLED argi-sistema gardenak txertatzea lortu da (TOLED); kontzeptu hori orain arte ez zegoen merkatu aeronautikoan.

 

Estaldura nanoegituratuetan oinarritutako gailu elektrokromikoei dagokienez, tenperatura altuko prozesuetan lan egin beharrak eragiten dituen mugak konpondu dira, substratu plastikoekin bateragarriak diren prozesu berriak garatuta. Gainera, elektrolito solido gardenak garatu dira, eroankortasun ioniko handiarekin eta atxikidura ezin hobearekin, elektrolito likidoen erabilerari lotutako mugak saihesteko.

 

Horrez gain, TOLED gailuei dagokienez, gardentasun handiko bost geruzako modulu bat garatzea lortu da. Halaber, ITO erabili ordez, erresistibitate txikiko eta gardentasun handiko AZO geruzak substratu plastikoen gainean jalkitzea lortu da.

 

Azkenik, gailu biak (elektrokromikoak eta TOLED) benetako hegazkin baten leihoaren neurrietara eraman dira, eta teknologia biak uztartuta konponbide orokorra garatu da.

 

Aipatutako lorpenek balio izan dute hegazkinetan premium funtzionalitateak dituzten leiho adimendunen kontzeptua balioztatzeko, baita garatutako teknologiaren moldagarritasuna egiaztatzeko ere, beste sektore industrial batzuetara estrapolatu ahal izateko, esaterako, automobilgintzara edo eraikuntzara.

 

Informazio gehiago:

http://inlight-project.eu/

Lanaren berritasunetako bat pultsu bidezko elektrodeposizio prozesuak aztertzeko eta optimizatzeko metodo kimiometrikoak erabiltzea da

Transactions of the Institute of Metal Finishing aldizkariak CIDETECeko ikertzaileek idatzitako artikulu bat hautatu zuen 2014ko azken zenbakirako. Aldizkari horrek nazioarteko estaldura ematen die gainazalen akaberei, gainazalen ingeniaritzari eta gainazalen funtzionalizazioari lotutako gaiei, bai oinarrizko ikerketaren arloan bai aplikazio industrialean, eta bigarren kuartilean indexatuta dago, Surfaces, Coatings and Films arloan.

Artikuluaren izenburua “Advanced Ni–W coatings obtained by the combination of pulse plating and chemometric techniques” da, eta CIDETECeko Gainazalen Dibisioko, Euskal Herriko Unibertsitateko Kimika Aplikatuko Departamentuko eta Bartzelonako Unibertsitateko Kimika Fisikoko Departamentuko ELECTRODEP laborategiko ikertzaileek egindako lanaren emaitza da. Bertan, teknika kimiometrikoak erabiliz korronte pultsuen bidez NiW estalduren elektrodeposizioan lortutako emaitzak deskribatzen dira, eta parametro esperimentalek estaldura horien egituran eta propietateetan duten eragina aztertzen da.

Ikerketa argitaratu duen argitalpenaren zenbakia korronte pultsuen bidezko elektrodeposizioari eskainita dago. Aldizkariak artikuluan sartutako irudietako bat aukeratu du bere lehen orrirako, lortutako emaitzen garrantziagatik. Irudi horrek aldagai askoko analisiaren bitartez lortutako erantzun-gainazal batzuk erakusten ditu, pultsuen parametroak eta garatutako NiW estalduren propietateak erlazionatzen dituztenak. Pultsu bidezko elektrodeposizio prozesuak aztertzeko eta optimizatzeko metodo kimiometrikoak erabiltzea ez dago oso zabalduta, eta horixe da hain zuzen lanaren berritasunetakoa.

CIDETEC presentó sus capacidades y últimos desarrollos en la 9ª edición de la feria referente en el sector aeronáutico celebrada en Frankfurt del 28 al 30 de octubre.