José Antonio Díez
Procesos de Recubrimientos Electrolu00edticos y Preparaciu00f3n de Superficies
· ·
José Antonio Díez
Procesos de Recubrimientos Electrolu00edticos y Preparaciu00f3n de Superficies
AMANECO proiektua hegazkineko bero-trukagailuetan zimurtasuna murrizteko prozesu bat ikertzen ari da, zeinaren geometria konplexua ez baita irisgarria metodo mekanikoen bidez.
Kalitate-estandar altuek definitu izan dute beti industria aeronautikoa. Hori horrela, fabrikazio gehigarriak eskaintzen dituen aukeren alde gehien egin duen sektoreetako bat izan da, eta metodo tradizionalekin konpondu ezin ziren erronkak konpondu ditu.
Ildo horretan, AMANECO proiektua bero-trukagailuak garatzen ari da fabrikazio gehigarriaren bidez; bide berriak ari da zabaltzen formari, pisuari eta efizientziari dagokienez, eta horrek aukera emango du aireontzien kostuak eta kontsumoa murrizteko.
Trukagailuen konplexutasun geometrikoak eta piezaren zenbait eremutara iristeko zailtasunek eraginda, behin fabrikatu ondoren ezin izaten da murriztu azaleko zimurtasuna, leuntze mekanikoko prozesuak edo metodo elektrokimikoak baliatuz. Zailtasun hori gainditzeko, CIDETEC Surface Engineering prozesatze kimikoaren osteko metodo bat garatzen ari da gainazalak hobetzeko, zeina baliagarria izango baita fabrikazio gehigarriaren bidez fabrikatutako barne-kanalak eta horma meheak dituzten piezetarako.
Lortek etxeak koordinatzen du Clean Sky 2 esparruaren barruko programa hau, eta SAFRAN enpresak ikuskaturik sortua da. 2022an zehar amaitzea aurreikusten da.
I-climabuilt proiektuak eraikinen inguratzaileetako material eta sistema teknikoak garatuko ditu, ia isurpenik ez izateko helburura gerturatu ahal izateko.
CIDETEC Surface Engineering erakundeak I-climabuilt proiektuan parte hartzen du. Egitasmo horrek 16 milioi euro baino gehiago bideratzen ditu Europar Batasunak eraikinetarako definitu dituen efizientzia energetikoko helburuen oinarriak ezartzera. Izan ere, eraikinetako efizientzia energetikoari buruzko zuzentarauaren arabera, eraikin berri guztiek zero inguruko energia-kontsumo-mailara iritsi behar dute 2020tik aurrera. Hau da, eraikinen energia-premiak oso txikia izan behar du, eta, batez ere, energia-iturri berriztagarriekin ase behar da. Gaur egun, eraikinek energia-kontsumo guztiaren % 40 inguru hartzen dute, eta Europan isuritako CO2-aren % 36 inguru sortzen dute.
Horrenbestez, merkatua errotik eraldatzeko premia bizia dugu. Bide horretan, teknologia eta material berriak eta eraginkorragoak hedatu behar dira eraikuntza-sektorean, eta, horri esker, isurpen-maila eta energia-kontsumo ia nulua dituzten eraikinak ezarri ahalko dira. I-climabuilt proiektuak efizientzia-maila egokiak lortzea eragotzi duten oztopoak gainditzeko lan egingo du, eta inplikatutako maila guztiak batuko ditu, hala nola materialen eta sistema teknikoen fabrikazioa eta sistema teknikoak eta osagaien garapena. Aldi berean, kontuan izango ditu faktore ekonomikoak eta finantzarioak ere, horiek definitzen eta kontrolatzen baitute eraikinetako inguratzaile-soluzioei dagokien onarpen soziala.
Hain zuzen ere, CIDETEC Surface Engineering erakundearen helburu nagusia da kalitate handiko eta kostu txikiagoko material omnifobikoak eskaintzea eskala pilotuan, eraikinetako inguratzaileen osagaietan ezartzeko eta baliozkotzeko. Gainera, CIDETECek optimizatu egingo du estaldura omnifobikoak egiteko bere instalazio pilotuaren gaitasuna, materialak bizkorrago onartzeko eta etorkizuneko instalazio esperimentaletan «I-climabuilt» ekosistemari hobeto lagundu ahal izateko.
I-climabuilt proiektuaren azken helburua hornitzaileen eta erabiltzaileen arteko konexioa erraztuko duen negozio-ingurune bat sortzea da, eta, hala, errazago barneratuko dira eraikinen inguratzaileen materialetan eta sistema teknikoetan berrikuntzak egiteko hurrengo txandan baliatuko diren soluzio teknologikoak.
I-climabuilt proiektuak partzuergo indartsu bat elkartzen du, profil osagarriak eta esperientzia handia duten hamaika ETEz eta 16 ikerketa-zentro nabarmenez osatua.
· ·
Nerea Markaide
AIRPOXY: Thermoformable, repairable and bondable smart epoxy based composites for aero structures
UNLOCK proiektua, CIDETEC Surface Engineering-ek koordinatua, lanean da hegazti-industriako hondakinak oinarri biologikodun produktu bilakatzeko, eta, ondoren, nekazaritza-aplikazioetara bideratzeko.
Europako hegazti-sektoreak urtean 3,6 milioi tona luma-hondakin sortzen ditu, eta horietatik % 25 inguru jasotzen dira bereizita, elikagai- eta ongarri-xedeetarako balioa gehitzeko. Maiatzaren 1ean Europako funtsekin finantzaturiko lankidetza-proiektu batek (UNLOCK) bestelako balio bat emango dio industria horretatik eratorritako hondakin-fluxuari. Hain justu, lumen % 90 inguru keratina da, eta proteina baliotsu hori material biodegradagarriak sortzeko iturri gisa baliatu daiteke.
«Europar Batasunaren Bioekonomia Estrategiaren ildotik, UNLOCK proiektuak balioa emango die oilasko-lumei, eta balio erantsi handiko produktuak fabrikatu ahal izango dira nekazaritza-aplikazioetarako. Gure soluzioari esker, murriztu egingo dira hegazti-sektoreak sorturiko hondakin horiek eta, aldi berean, jatorri berriztagarria duten produktuak baliatu ahal izango dira nekazaritzan, egun baliatzen diren jatorri fosileko produktuen tokian», nabarmendu du Sarah Montes CIDETEC Surface Engineeringo kideak eta UNLOCK proiektuaren koordinatzaileak.
Bioindustriarako Enpresa Erkideak (BBI JU, Bio-based Industries Joint Undertaking) finantzatuko du lau urterako egitasmo hau. Hala, UNLOCK proiektuko bazkideek balio-kate berritzaileak diseinatuko dituzte, jasangarriak ekonomiaren eta ingurumenaren aldetik, lumetan oinarritutako bioekonomia sortzeko. Lumei balioa emateko, lau prozesu aurreikusten dira, lortu nahi den amaierako produktuaren arabera: tratamendu mekanikoa, lurrun-eztanda, mikrobio-hartzidura eta hidrolisi kimikoa.
Oinarri biologikodun proiektu horiek nekazaritza-sektorearen premietara egokituak izango dira, eta hazi-azpilak, geotestil ehundu gabeak, lur-estalkietarako filmak eta apar hidroponikoak sortuko dira. Horretaz gainera, material berritzaile horietako keratinak ingurumen-balio osagarriak ekarriko ditu produktu-bizitzaren amaieran: keratina oinarri duten proiektuek ez dute sortuko batere hondakinik eta biodegradagarritasun kontrolatua ahalbidetuko dute. Horretaz gainera, lurzoruak aberastuko dituzte nitrogeno organikoarekin.
Ekimen desafiatzaile eta esperantzagarri honi heltzeko, hamabost bazkide europarrek hasierako bilera ofiziala egin zuten online apirilaren 28an. Horren bidez, agerian geratu ziren UNLOCK proiektuan diharduen partzuergoaren oreka eta indarra, zeinak balio-kate osoa biltzen baitu, hala nola lehengaiak eta hornidura-katea aztertzea, baina baita ekipamenduak, prozesuak, amaierako produktua eta jasangarritasuna ebaluatzea ere.
Hegazti-produkzio tradizionalak sistema zirkular eta jasangarri izateko bidea hasi berria izanik ere, proiektuaren amaieran bi biofindegi komertzial egongo dira martxan, lehenbizikoak beren alorrean.
KaRMA2020 egitasmoak izaniko arrakasta oinarri harturik, UNLOCK proiektuak hainbat urrats egin nahi ditu aurrera, Europan nekazaritza-sistema jasangarriagoa lortzeko.
UNLOCK proiektuak Europar Batasunaren Horizon 2020 ikerketa eta berrikuntza programaren dirulaguntza jaso du (5 milioi eurokoa), 101023306 akordioaren bidez. 2021eko maiatzaren 1ean hasi zen ofizialki, eta 2025eko apirilera arte egongo da martxan.
Egon eguneratuta
Harpidetu zaitez gure newsletterretara gure zentroetako azken berrikuntza teknologikoak eta ekitaldiak ezagutzeko.