Nanomedicine

Joan den maiatzaren 14an, CIDETEC Nanomedicine-ren instalazioak bisitatu zituen Nafarroako Unibertsitateko Ingeniaritza Biomedikoko Masterreko ikasle talde batek.

Aipatutako masterreko ikasgaietako bat Nanoteknologia eta Ingeniaritza Biomedikoa da; Nafarroako Unibertsitateko María Blanco katedradunak irakasten du, CIC nanoGUNE-ko bi ikertzaileren laguntzaz: Alexander Bittner eta Mato Knez irakasle gonbidatuak.

Bisitan zehar, gaur egun CIDETEC Nanomedicine-n lantzen diren ikerketa ildo nagusiei buruzko informazioa jaso ahal izan zuten ikasleek, eta bertatik bertara ikusi ahal izan zituzten zentroak dituen ekipo eta instalazioak.

CIDETEC Nanomedicine enpresaren baitatik sortutako EMISSARY enpresak erakustoki batekin parte hartu zuen Parisen apirilaren 2tik 4ra burutu zen azokan. Aurten 30. urteurrena egin duen in-cosmetics global azoka zaintza pertsonalerako osagaien sektoreko ekitaldi nagusien artean dago eta osagai hauen hornitzaileak (erakusketariak) amaierako produktuaren fabrikatzaileekin (bisitariak) elkartzeko balio du, modu horretan harremanak ezartzea, joerak aztertzea eta produktu berriak aurkeztea ahalbidetuta. Aurtengo edizioak errekor guztiak gainditu ditu 12.000 bisitarira iritsita.

EMISSARY-k bost produktu berri aurkeztu zituen: zeramida eta azido hialuronikoa dituzten nanokapsulak zahartzearen aurkako produktuen lerrorako eta kurkuma, DPG eta A bitamina antioxidatzaile gisa. CIDETEC Nanomedicine-n izenean koloide adimentsuen lerroaren erantzulea den Aitziber López doktoreak parte hartu zuen azokan. Emissary-ren izenean María Arbulu doktoreak parte hartu zuen, enpresako kontseilari delegatuak.

Emissary Cosmetics enpresa CIDETEC-etik eratorritako spin off enpresa bat da eta kosmetikoen industriarako kapsulatze sistema adimentsu baten merkaturatzea du helburu. Emissary-k kapsulatze teknologia patentatu bat du, larruazalaren beharren arabera osagai kosmetikoaren jariatzearen abiadura erregulatzeko gai diren polipeptidoetan oinarritzen dena. Polipeptido kapsulek osagai aktibo hidrofobikoak nahiz hidrofilikoak kapsulatzeko gaitasuna dute eta bezeroaren beharretara molda daitezke.

CIDETEC Nanomedikuntzak antolatu zuen Osasun Produktuen Sektorerako Open Innovation Test Beds aurkezpena, otsailaren 20an Donostian. Ekitaldia Arima hotelean egin zen eta Europako Batzordeak hiru proiektu berriak abian jarri dituen ordezkariek parte hartu zuten, baita esanahi handiko EAEko sektoreko eragileak ere.

Europako osasun teknologia sektorea oso berritzailea izan arren, enpresa txikiez bultzatuta dago gehienbat eta, erregulazio berriak jota, bere lehiakortasuna eta berrikuntza arriskuan izan zitezkeen. Europako Batzordeak hiru proiektu berri abiarazi ditu sektoreko industriek berrikuntza handia izan dezan laguntzeko. Horretarako, medikuntzako tresna sektore OpenInnovationTest  Beds  deritzon ekimena jarri du martxan. Bere helburu zera da: lehiatila bakar baten bidez enpresa berritzailei  zerbitzua emateko balio-kate osoan, kontzeptu frogatik laborategiko eskalaraino, CE marka lortzeko aurreko etapa eta saiakuntza klinikoak barne. Proiektu horiek euskal erakundeen partaidetza handia dute, haietako bi Euskaditik koordinatuta daude (bat CIDETECek) eta hirugarrenean Gipuzkoako teknologi zentro bat parte hartzen duela.

CIDETEC Nanomedikuntzak antolatutako hitzaldietan parte hartu zuten Maria Aguirre, Eusko Jaurlaritzaren  Ikerketa eta Berrikuntza Sanitarioko zuzendaria eta Corinna Hahn, Eurice zuzendaria. Iraida Loinazek eta Laura Sanchezek (CIDETEC) eta Angel Pozok (BioPraxis) aurkeztu zituzten hiru proiektuak.

Duela gutxi, Europako Batzordeak 5,5 milioi euroz finantzatu du kartilagoaren birsorkuntza ikertzeko proiektu bat, non CIDETEC Nanomedikuntza Institutuko Biomaterialen Unitateak parte hartzen duen, zazpi herrialdetako beste bederatzi lankiderekin batera. RESTORE da proiektuaren izena, eta helburua 3Dko matrizeak sortzea da, belauneko kartilagoaren lesioak konpontzeko nanomaterial adimendunak txertatuz; horrela, gaur egun mundu osoan 242 milioi pertsonari eragiten dion osteoartritisaren hasiera murriztu edo atzeratu liteke.

i3S-ko ikerlari eta Europako partzuergoaren koordinatzaileak, Meriem Lamgharik, honako hau azaldu du matrizeei buruz: «neurrira egiten dira, inplantatu eta lesioaren eremua bete ahal izan dezaten, eta belauneko giltzaduraren indar mekanikoei erantzun ahal izan diezaieten. Are gehiago, propietate birsortzaile, antiinflamatorio eta antimikrobianoak dituzten nanopartikula adimendunak hartzen dituzte barnean. Beharrezkoa izanez gero, propietate birsortzaileak dituzten nanopartikulak urrunetik aktibatu daitezke, metodo ez-inbasiboak erabilita». Horretarako, inplantatu den matrizean dauden nanopartikulak aktibatzeko gai diren sentsoreak dituen belaunetako bat garatuko du proiektuko taldeak.

CIDETEC Nanomedikuntza Institutuko lantaldeak 554,375 € inguru jasoko ditu bere lana garatzeko; hau da, «nanobiomaterial adimendunak garatzea, zelulaz kanpoko kartilago-matrizearen narriadura eta inflamazioa erregulatzeko eta infekzio-mehatxuak saihesteko. Horrek ehunak birsortzen eta pazientea sendatzen lagunduko du» azaldu du Damien Dupin doktoreak.

RESTORE zirujau ortopedikoen, ehun-ingeniarien, material-ikertzaileen eta biologo zelularren arteko eztabaida eraikitzaileen ondorioz sortu zen, premia klinikoei erantzuna eman nahian. Horregatik, azaldu du Meriem Lamgharik, «bi matrize proposatu ditugu: bata jadanik albaitaritza-sektorean (zehazki, animalia handietan) klinikoki testatutako polimero batean oinarritua, belauneko kartilagoaren lesio handietarako; eta bestea bioinprimatze-teknologia erabiliz sortutako matrize bat, giza jatorriko kartilago-zelulaz osatua, eta hor ere nanopartikula adimendunak txertatutako ditugu. Matrize hori lesio txikietarako izango da egokiagoa».

Partzuergoak hurrengo 44 hilabeteetan garatuko du proiektua, eta Portugal, Italia, Alemania, Islandia, Norvegia, Suedia eta Finlandiako parte-hartzaileak izango ditu. Horrez gain, Europako beste proiektu batzuekin lotura du: besteak beste, MIRACLErekin (belauneko giltzaduraren narriaduraren diagnostikoari buruzkoa) eta REFINErekin (gizakietan nanoteknologiak eta nanomaterialak erabiltzeko biosegurtasun-protokoloak garatzekoa).

Aitziber López Elorza doktoreak, CIDETEC Nanomedicine-ren izenean,”Skin-responsive smart nanocapsules for triggered release of active ingredients in damaged skin” lana aurkeztu du 30. IFSCC CONGRESS biltzarrean. Munichen izan da biltzarra, irailaren 18tik 21era bitartean, International Federation of Societies of Cosmetic Chemists erakundeak antolatuta, eta mundu osoko 1.500 ordezkari baino gehiago elkartu dira lau egunez. Zientzia kosmetikoaren alorreko ekitaldirik garrantzitsuenetakoa da; 90 hitzaldi eta 400 poster baino gehiago aurkeztu dira. Horrez gain, biltzarrak aukera ematen du merkatuko joera berriak ezagutzeko eta sektoreko punta-puntako enpresekin harremanak izateko.