CIDETECek koordinatutako ECOXY Europako proiektuaren 30. hilabeteko bilera egin da

Azaroaren 20an eta 21ean, Cidetec koordinatutako ECOXY Europako proiektuaren 30. hilabeteko bilera egin zen Aittip zentroaren Zaragozako instalazioetan. CIDETEC Surface Engineering-en aldetik, Sarah Montes eta Aratz Genua izan ziren bileran, eta egindako aurrerabideen aurkezpen orokorra egiteaz gain, zehatz-mehatz azaldu zituzten 1. lan paketearen nondik norakoak (Project management), alderdi teknikoak eta finantzarioak barnean hartuta.

ECOXY proiektuak oinarri biologikoko erretxina epoxiko eta zuntz-indargarri berritzaileak garatzen ditu, zuntzez indartutako konposatu termoegonkor (FRTC) berriak, jasangarriak eta teknologikoki lehiakorrak ekoizteko, funtzionaltasun aurreratuak lortzeari begira: konpongarritasuna, birprozesagarritasuna eta birziklagarritasuna (3R). 3R funtzionaltasunak lortzeko, erretxina-formulazio berriak erabiliko dira. Horietan, gogortzaile dinamikoekin ordezkatuko dira eskuarki erabiltzen diren ontze-agenteak. Albistearekin batera doan argazkian, proiektuaren erakusgarri handienetako bat ikus daiteke. Oinarri biologikoko eta zuntz naturaleko erretxina-epoxikoak erabiliz egin da. Automobil baten atzeko eserlekuko panel bat da, eta orain arte lortutako emaitza esperantzagarrien adibide ona da.

Bileran, proiektuan azken 6 hilabeteetan egindako aurrerapenak eta lortutako emaitza nagusiak berrikusi ziren. WP leader bakoitzak bere lan-paketean egin diren aurrerapenak eta lortu diren emaitzak azaldu zituen, pakete bakoitzean parte hartu duten bazkideen laguntzaz. DoA-n deskribatutakoari jarraikiz proiektuak aurrera ongi egin dezan eman beharko diren hurrengo pausoak adierazi zituzten CIDETECen ordezkariek. Partzuergoaren hurrengo bilera datorren maiatzean egingo da, CRFren instalazioetan (Italia).