CIDETECek eta Gipuzkoako Foru Aldundiak lankidetza berritu dute Naturklima laborategia indartzeko eta bateriak birziklatzen aurrera egiteko

Hitzarmena berritzeak aukera emango du CIDETEC hartzen duen Naturklima laborategiari gaitasun zientifiko teknologiko berriak ematen jarraitzeko, bai eta lurraldea baterien zirkulartasunean erreferente gisa bultzatzeko ere.‑

CIDETECek eta Gipuzkoako Foru Aldundiko Jasangarritasun Departamentuak lankidetza hitzarmena berritu dute Naturklima laborategiari jarraipena eta bultzada berri bat emateko. Laborategi hori CIDETECek Eskuzaitzeta industrialdean dituen instalazioetan dago, eta bateriak birziklatzetik datozen materialen karakterizazioan espezializatuta dago.

Hitzarmena sinatzeko, Francisco Javier Rodríguez CIDETECeko zuzendari nagusiak eta Jose Ignacio Asensio Jasangarritasuneko foru diputatuak parte hartu dute, eta nabarmendu dute lankidetza publiko pribatu horrek garrantzitsua dela Gipuzkoak energia trantsizioari eta ekonomia zirkularrari lotutako industria eta teknologia polo gisa duen posizionamendua indartzeko.‑

Akordio berri horrek 2024an hasitako lan ildoa sendotzen du, eta bi erakundeek lurralderako gaitasun estrategikoen garapenean aurrera egiten jarraitzeko duten borondate partekatuari erantzuten dio, birziklatzearen, berrerabileraren eta baterien bigarren bizitzaren inguruko balio kate industrial bat indartuz. Mugikortasun elektrikorako, industriaren deskarbonizaziorako eta Gipuzkoako autonomia estrategikorako funtsezko eremua da, energia biltegiratzeko teknologien eskaera gero eta handiagoa den Europako testuinguru batean.

Lankidetza horren esparruan, Jasangarritasun Sailak 350.000 euroko finantzaketa bideratu du balio erantsi handiko ekipamendu zientifiko berria erosteko. Horri esker, laborategiak material birziklatuen prestakuntza, formulazio eta karakterizazio fisiko kimiko, mikroestruktural eta elektrokimikoko prozesuetan dituen gaitasunak handitu ahal izango dira, laborategiko eskalatik hasi eta fase pilotuetara arte. Bestalde, CIDETECek ekipamenduan eta azpiegituretan egindako inbertsioarekin osatzen du ekarpen hori, baita bere esperientziarekin eta ikertzaile kualifikatuekin ere.‑

Javier Rodríguez CIDETECeko zuzendari nagusiak nabarmendu duenez, “hitzarmen hau berritzeak lankidetza estrategiko bat sendotzen du, eta, horri esker, ezagutza eta teknologia sortzen jarraitzen dugu, baterien bizi zikloa ixteko. Naturklima dagoeneko funtsezko aktiboa da Gipuzkoako ekosistema industrial eta zientifikorako, eta bultzada berri horrek bere eragina eta proiekzioa zabaltzeko aukera emango digu ”.

Hitzarmenak, halaber, bi erakundeen arteko lankidetza aurreikusten du emaitzen ustiapenean, ezagutzaren transferentzian, sortutako aurrerapenak informazio publikoko sistemetan txertatzean eta dibulgazio tekniko, zientifiko eta instituzionaleko ekintzak egitean, CIDETECek energia biltegiratzearen eta jasangarritasunaren esparruan eragile traktore gisa duen zeregina indartzeko.

Era berean, Naturklimak eta CIDETECek elkarrekin bultzatzen dute International Zirkular Bat Workshop, bateriak birziklatu eta berrerabiltzearen arloko nazioarteko adituak bilduko dituen topaketa, ekainaren 26an Naturkliman egingo den hirugarren edizioa. Laster irekiko dira izen-emateak.