CIDETEC Surface Engineering-ek material seguruak eta jasangarriak garatzeko BioPhenom proiektu europarrean parte hartzen du

Bio-oinarria duten material berriek gizakien osasunerako eta ingurumenerako arrisku handiko egungo SVHCak ordezkatuko dituzte.

CIDETEC Surface Engineering enpresak parte hartzen duen BioPhenom proiektuaren helburua da produktu petrokimiko arriskutsuen erabilera orokorrari konponbide bat ematea. Produktu horietako asko arrisku handiko substantziak dira (SVHC), ingurumenerako eta gizakien osasunerako kaltegarriak baitira. Gaur egungo industria jarduerek SVHC erabiltzen dute material termoplastikoen eta termoegonkorren eta zurezko materialen funtzionaltasuna formulatzeko eta hobetzeko; SVHCak, ordea, toxikoak eta ez-biodegradagarriak dira. Hori dela eta, premiazkoa da produktu horietarako aukera seguruagoak eta jasangarriagoak aurkitzea.

Ildo horretan, Europako Itun Berdeak eta zero kutsadurarako duen helburuak ezarri dute bio-oinarria duten eta seguruak eta jasangarriak diren konponbideak txertatzea diseinutik bertatik, ekonomia zirkularrerako trantsizioa azkartu eta hondakinak murriztu ahal izateko. BioPhenom proiektuak, teknologia eta prozesu aurreratuak baliatuz (hala nola pirolisi azkarra eta erauzketa likidoa), biomasa industrialaren bigarren mailako fluxuen biofenol isolatuak aztertu nahi ditu, sugarraren bio-atzeratzaileak sortzeko (bio-IFRak), eta, beraz, SVHCen ordez, material seguru, jasangarri eta birziklagarriak erabiltzeko. Horri esker, zurezko produktuak, karbono zuntzezko konposite termoegonkorrak eta material konposatu termoplastikoak hainbat aplikaziotarako baliatu ahal izango dira, fabrikazioan produktu kaltegarriak erabili behar izan gabe.

BioPhenom proiektuak lau urte iraungo ditu eta 3,6 milioi euroko aurrekontua izango du. Europa osoko 10 herrialdetako 12 bazkideko partzuergo dinamikoa bilduko du; honako hauena, besteak beste: 5 RTO (VTT, NIBIO, LIST, CIDETEC, CNR), 1 unibertsitate (UoB) eta 6 ETE (NT, INVENT, SP, EwC, CRCF, TALOS).