CIDETEC Energy Storagek ibilgailu elektrikoetarako bateria seguruagoak, jasangarriagoak eta arinagoak garatzeko Europako RESiLiTE proiektuan parte hartzen du

Partzuergoak battery-packaren pisua % 35 murriztu nahi du, dentsitate energetikoa eta efizientzia handitzea ahalbidetuz.

CIDETEC Energy Storage Europako RESiLiTE (Robust and economical battery packs based on silicon-rich cells and lightweight thermal efficient design) proiektuaren parte da. Proiektu horren helburua da ibilgailu elektrikoetarako bateria sistema berri bat diseinatzea, formatu handiko gelaxka zilindrikoak (46xx) eta gehigarri jasangarriekin indartutako material termoplastikoaren karkasa berritzailea konbinatzeko.

Soluzio horri esker, battery-packaren pisua % 35eraino murriztu ahal izango da egungo aluminio egituren aurrean, eta, horrela, dentsitate energetikoa eta efizientzia handituko dira. Hau da, energia gehiago biltegiratzea ahalbidetuko du, tamaina handitu gabe. Gainera, bateria berriek hozte sistema aurreratu bat eta algoritmo adimendunak izango dituzte, eta 10 minutu eskasean % 10etik % 80ra kargatu ahal izango dira, segurtasun maila handia mantenduz, baita erabilera baldintza zorrotzetan ere. Proiektuaren beste erronka nagusietako bat sistemaren jasangarritasuna hobetzea izango da, material birziklagarrien eta ingurumen inpaktu txikiagoa dutenen alde eginez.

CIDETEC Energy Storagek funtsezko zeregina izango du RESiLiTEn, bateriak kudeatzeko sistemaren (BMS) softwarea garatzeaz eta integratzeaz arduratzen baita INFINEONen hardwarean, bai eta inpedantzia elektrokimikoko espektroskopian (EIS) oinarritutako funtzionalitate aurreratuak baliozkotzeaz ere. Funtzionalitate horiei esker, gainberotzeko arriskuak goiz detektatu, gelaxken barne tenperatura kalkulatu eta kudeaketa termikoko algoritmoak optimizatu ahal izango dira.

Kautex Textron GMBH & CO KG enpresak koordinatzen du proiektua, 6 milioi eurotik gorako aurrekontua du, eta 2028aren erdialdean amaituko da.